GLADE VINNARAR: Journalist Veronica Irmelin Ellingsen og redaktør i Bø blad, Hilde Eika Nesje, får overrekt prisen av kunstnar Maud Angelica Behn.

Får nasjonal pris for serie om sjølvmord

Bø blad er kåra til vinnar av Papageno­prisen, ein ny nasjonal pris. Bakgrunnen er artikkelserien «Kvar einaste av oss tel».

Gro Birgitte Røiland Gro Birgitte Røiland
Publisert Sist oppdatert

Torsdag 22. oktober kunne redaktør Hilde Eika Nesje og journalist Veronica Irmelin Ellingsen ta imot Papagenoprisen på eit stort arrangement i Pressens Hus i Oslo.

Kunstnaren Maud Angelica Behn har utforma prisen, og det var Behn sjølv som stod for overrekkinga av den gjæve prisen til Bø blad.

Papagenoprisen blir delt ut av Regionale ressurssentre om vold, traumatisk stress og sjølvmordsførebygging (RVTS), i samarbeid med Landsforeningen for etterlatte ved sjølvmord (LEVE). 

Dette er ein ny nasjonal medie- og formidlingspris som skal løfte fram ansvarleg og etisk formidling om sjølvmord og livskriser.

PRISVINNARAR: Redaktør Hilde Eika Nesje og journalist Veronica Irmelin Ellingsen under overrekkinga av Papagenoprisen.

Kvar einaste av oss tel

I sommar starta Bø blad serien «Kvar einaste av oss tel».

Gjennom fleire artiklar har journalist Veronica Irmelin Ellingsen sett søkelys på sjølvmord gjennom intervju med pårørande, menneske som har vore nær ved å ta sitt eige liv og folk i kriseteam og hjelpeapparat i Midt-Telemark.

Talmateriale til sakene har Bø blad fått frå Samarbeidsdesken, eit journalistisk fellesprosjekt mellom Landslaget for lokalaviser (LLA), Senter for undersøkande journalistikk (SUJO) og NRK.

Arbeidet har så langt ført til tolv artiklar som både er presenterte i nettavisa og på papir. Det er desse artiklane som gjer at Bø blad nå er heidra med Papagenoprisen.

– Verdig vinnar

Lokalavisa i Midt-Telemark er valt ut av ein fagjury beståande av representantar frå mediebransjen og ulike organisasjoner, leia av Reidun Kjelling Nybø, general­sekretær i Norsk redaktørforening.

Ifølgje prosjektleiar for Papagenoprisen og rådgivar ved RVTS, Julie Andreassen, har det blant dei nominerte vore fleire ulike nyheitsredaksjonar, forfattarar, influensarar, podkastar og organisasjonar.

Det er fagjuryen som har valt ut vinnar, men prosjektleiaren avslører at ho heiar på valet.

– Bø blad er ein kjempeflott og verdig vinnar, og eg synest fagjuryen har gjort gode vurderingar og lagt ned eit godt stykke arbeid. Sjølv om Bø blad er ein liten redaksjon, er de modige og framoverlente - og tar sats. De tør å satse på noko me veit har ein sjølvmordsførebyggande effekt, seier Andreassen.

Papagenoeffekten

Prisen har namn etter det som blir kalla papagenoeffekten. Namnet Papageno er henta frå Mozarts opera Tryllefløyten. I historia vurderer karakteren Papageno å ta sitt eige liv, men blir stoppa av andre som hjelper han til å sjå at det finst alternativ.

Papagenoeffekten er når aviser og andre medium fortel historier om menneske som har stått i krevjande og vanskelege livssituasjonar, men klart å kome seg ut av det, og viser alternative måtar å kome over det som har vore vanskeleg. Det kan ha sjølvmordsførebyggande effekt. 

Fleire europeiske land har hatt Papageno­prisen i fleire år, mellom anna Danmark, men det er fyrste gongen den blir delt ut i Norge.

PRISUTDELING: Papagenoprisen blei delt ut i Pressens Hus i Oslo torsdag kveld. F.v. Anders Lie Brenna, Hilde Eika Nesje, Maud Angelica Behn og Veronica Irmelin Ellingsen.

Glad, stolt og audmjuk

Redaktør Hilde Eika Nesje er både glad, stolt og audmjuk over at lokalavisa får den nyetablerte prisen.

– Me veit at det er mange andre dyktige formidlarar av sjølvmordsproblematikk, så dette betyr mykje for oss. Men mest av alt minner den oss på kvifor me gjer dette. Å jobbe med vanskelege, nære og tunge tema gjer jobben vår meiningsfull. Det gjer godt å sjå at det me publiserer faktisk kan bety noko for lesarane våre og kan gjere ein forskjell, seier ho. 

Ho peikar på at me alle har eit ansvar for å sjå og ta vare på dei sårbare blant oss, og at openheit er eit verktøry som kan vere med og lyse opp dei mørke krokane.

– Lokalavisa sitt oppdrag er å spegle samfunnet og sette søkjelys på ulike deler av det. Sjølvmord er dessverre ein del av verkelegheita vår, og håpet er at me kan vere med og skape ein trygg arena for dei vanskelege samtalene i vårt eige nærmiljø, seier redaktøren.

Ho skryter av journalisten som har skrive artiklane med sjølvmordstema.

– Når ein set i gang slike prosjekt må ein ha folk som har lyst til å gjere det. Som redaktør har eg vore heldig å ha ein flink journalist som har gått inn i dette med medmenneskelegheit og stor respekt for dei ho har snakka med. Veronica har på ein svært god måte bidratt til ansvarleg formidling om sjølvmord, seier Eika Nesje.

GRUNNGJEVING: Anders Lie Brenna frå fagjuryen les opp grunngjevinga for at Bø blad fekk Papagenoprisen.

Stor tillitserklæring

Fagjuryen uttalar at det å bli peika ut som den første vinnaren av ein nyetablert, nasjonal pris som har som målsetting å fremje og heidre eksempel på god, håpefull og ansvarleg formidling som kan bidra til å forebygge sjølvmord, er ei stor tillitserklæring.

– Bare det å bli nominert betyr at ein har sett spor etter seg i det førebyggande landskapet. Juryen har hatt ei positivt utfordrande oppgåve med å kåre ein vinnar, med tanke på alle dei gode nominasjonane som har blitt meldt inn. Det er rørande og inspirerande å sjå kva einskildpersonar og organisasjonar gjer for å fremje livshåpet gjennom ansvarleg formidling, og kva dette betyr for mange menneske i samfunnet, uttalar juryen vidare.

Viktige kriterium for prisen er blant anna at tiltaket skal auke bevisstheit og kunnskap om sjølvmordsførebygging gjennom ansvarleg formidling, løfte fram håp, meistring og alternative løysingar til sjølvmord og bidra til å bryte tabu og redusere stigma.

Juryens grunngjeving:

Prisen blir delt ut til ein lokal samfunnsaktør som gjennom mot og klokskap har evna å sette sjølvmord, sjølvmordstankar og sjølvmordsførebygging på agendaen over tid. Aktøren har, gjennom innhald og uttrykksform, klart å formidle konsekvensane sjølvmordstankar og sjølvmord kan ha for både individet, familien, støtte- og hjelpepersonellet og samfunnet som heilskap. Gjennom nære intervju har me kome tett på einskildmenneske som med sine ærlege skildringar har formidla korleis det er å kjenne på livsutfordringar, og å vere etterlatt og berørt, også som fagperson. Samtidig har me fått eit innsyn i håpet som alle kjenner på, til tross for det dei har vore gjennom.

Måten desse intervjua har blitt presentert på, viser ein aktør som ønsker å ta ei sjølvmordsførebyggande rolle i lokalsamfunnet. Under logoen «Kvar einaste av oss tel», har lokalavisa over tid samla ulike artiklar relatert til temaet.  Redaktøren grunngjev kvifor dei vel å sette søkelys på denne samfunnsutfordringa på følgjande vis:

«Å skrive om sjølvmord er noko av det vanskelegaste ein redaksjon kan gjere. I ei lita lokalavis er det enda meir krevjande – fordi me er tett på liva til folk i Midt-Telemark.

Me gjer det likevel, men med opne auge og varme hjarte. Ikkje for å riste i sensasjonar, men for å redde liv. Kvar einaste av oss som bur i Midt-Telemark tel – me betyr noko – i lokalsamfunnet, i omgangskretsen og i den inste sirkelen vår. Sjølvmord har historisk sett vore prega av skam og blitt forteia. Det har blitt betre med åra, med større openheit og meir tabuknekking, men framleis er dette eit tema som er vanskeleg».

Denne tilnærminga til lokalavisa gjenspeglar seg i alle artiklane. Lokalavisa har heller ikkje gøymt bort tema nedst på nettsida eller kortvarig. Tvert om. Logoen «Kvar einaste av oss tel» er presentert på framsida dagleg. Alle artiklane blir viste med informative og konstruktive titlar i ein karusell som har vore synleg for alle som har besøkt lokalavisa over lengre tid. Dette uttrykker eit viktig signal i seg sjølv: me er der for deg – ikkje berre i dag, men kvar dag. Me treng deg – kvar dag.  Ei slik synleggjering er å bryte ned tabu og stigma i praksis.  

Artikkelserien vektlegg at håp kan tennast og at livet kan kjennest verd å leve etter livskriser, utan å forenkle ei slik vending. Denne vinklinga, kombinert med det redaksjonelle uttrykket, syner i praksis korleis små lokalaviser kan ha stor gjennomslagskraft. Avisa syner til fulle at dette temaet kan og må me løfte fram som grunnlag for handling.

 Juryen meiner også at innhaldet er i tråd med god presseskikk og dei rammene som den reviderte «Ver varsam-plakaten» legg for omtale av sjølvmord i media. Det krev god balanse å skulle manøvrere mellom ønsket om å vere ein ansvarsfull aktør i lokalsamfunnet som vil styrke håpet kontra eit resultat der ein i verste fall nører opp under håpløyse. I dette tilfellet har balansen vore god.

Gjennom sitt bidrag har vinnaren prioritert eit tema mange kjenner seg åleine om.  Slik har ein sett standard for korleis sjølvmord kan løftast fram som samfunnstema. Juryen håper at innhaldet vil nyttast som grunnlag for samtaler både på skular, heimar og andre arenaer. Nettopp fordi temaet er belyst klokt og håpefullt frå mange vinklar.

 Det er også positivt at artikkelserien er utarbeidd som del av samarbeidet med «Samarbeidsdesken», noko som gjer at ein pris til denne lokalavisa også er ei anerkjenning til alle lokalaviser som har sett sorgstøtte, sjølvmordstankar og sjølvmord på agendaen.

 Gjennom tildelinga ønsker juryen å løfte fram viktigheita av at me saman kan redusere stigma og styrke håpet ved å vere ei tydeleg stemme i det sjølvmordsførebyggande arbeidet, slik vinnaren av prisen har gjort.

 Med dette tildeler me Papageno-prisen 2026 til Bø Blad og ansvarleg redaktør Hilde Eika Nesje. Då journalist Veronica Irmelin Ellingsen har laga dei fleste artiklane i denne satsinga, ønsker me å trekke ho fram særskilt i samsvar med nominasjonen.

 Gratulerer – ein verdig vinnar av Papageno-prisen 2026!

 

 

nyheit
Powered by Labrador CMS