Pønkeband frå Bø inntek Kroa laurdag

Fire Bø-studentar frå Toten, Trøndelag, Tønsberg og Island har i Bø funne saman og danna pønkebandet «Anal Kanal». Laurdag trommar dei saman til konsert på Kroa i Bø og slepper samtidig debutalbumet sitt.
– Namnet kom opp som ein morosam kommentar av ei veninne av oss, seier talsmann Andreas Bjørke Sollien, og legg til at bandet spelar ein riffbasert og rocka variant av pønk med norske tekstar.
Bandet har spelt konsert på Bull Inn i mai i fjor og på fleire av Studentkroa sine open-scene-arrangement.
Sjølve musikken er spelt inn på hovudscena på Kroa og alt bortsett frå masteringa har dei gjort sjølv.
Han som er trommeslagar i bandet debuterte like godt bak trommesettet på bandets første konsert på open scene, utan nokon gong å ha spelt trommer.
– Musikken tek for seg studentlivet, og litt fyll og fanteri. Einaste fysiske utgjeving blir på kassett og det er ein sjarmerande og god tradisjon i pønkeundergrunnen, seier Bjørke Sollien.