– Me kunne nok oppsøkt unge på andre måtar

– Eg oppfordrar alle til å bruke stemmeretten sin, for alle si stemme tel, seier ordførar Siri Blichfeldt Dyrland i Midt-Telemark kommune. Ho representerer Senterpartiet.

Ordføraren peikar på at mange er glade i det norske samfunnet, der alle har rett til å stemme, og der valsystemet er slik at kvar einaste stemme kan vere med å påverke valresultatet. 

Ein folkerett å stemme

– Å kunne stemme er ein viktig folkerett. At me byggjer opp om demokratiet vårt er viktig for kva slags samfunn me får i framtida, seier Blichfeldt Dyrland. 

Politikarkollega i Midt-Telemark, Karin Hagen frå Arbeiderpartiet, er einig og synest det er veldig synd at så mange unge vel å ikkje stemme.

– Det er ein trussel mot demokratiet at folk ikkje bryr seg om å stemme. I Noreg har me eit system der vanlege folk kan vere med og bestemme valresultatet. Samtidig er manglande deltaking eit signal om at me politikarar ikkje klarer å engasjere dei unge nok, seier ho.

Hagen synest likevel det er interessant å følgje årets valkamp, der det ser ut som bevisst bruk av sosiale medium får fleire unge engasjert.

– Det blir spennande å sjå om det å snakke til unge i deira kanalar vil påverke valresultat og deltaking, seier ho.

Interessante saker betyr noko

Hagen trur at engasjement også handlar om at politikarane klarer å treffe dei unge med saker som dei er opptatt av.

– Også når det er stortingsval har me lokalpolitikarar eit kjempeansvar for å skape lokalt engasjement for politikk og inkludere dei unge, men det kan vere vanskeleg å vite kva som er det riktige å gjere, seier Hagen.

Ho innrømmer at å stå på stand på torget i Bø sentrum ikkje nødvendigvis er det som trekker dei store unge veljarmassene.

– Me gjer oss likevel synlege og tilgjengelege, men me kunne nok oppsøkt unge på andre måtar når dei ikkje kjem til oss, seier ho.

– Alle må framsnakke valet

Blichfeldt Dyrland synest det er veldig trist at nesten halvparten av unge menn i Midt-Telemark vel å ikkje stemme. 

– Me skal sjølvsagt ha respekt for dei som ikkje brukar stemmeretten sin. Eg synest likevel at me alle har ein jobb å gjere for å framsnakke det å stemme ved norske val, seier ho.

Ho meiner det er viktig å lære frå tidleg alder, heilt frå barnehagen og småskulen, kor viktig det er at alle kan vere med og bestemme. 

– I tillegg må me som er politikarar lære oss til å bruke eit språk som er forståeleg, slik at politikken blir truverdig, seier Blichfeldt Dyrland. 

Ho peikar på at mange trur at det ikkje nyttar å stemme, og at den oppfatninga må dei som driv med politikk, skulevesenet, foreldre og medmenneske gjere noko med.

– Så mange som muleg må fortelje dei unge at dersom me vil bevare det demokratiet me har, så må me bruke det. Demokratiet er ikkje perfekt, men eg trur alternativa ikkje er så bra for oss, seier ordføraren.

Kan legge meir til rette

Politikarane har eit stort forbetringspotensial i å gjere val og politikk meir tilgjengeleg, også digitalt, ifølgje Blichfeldt Dyrland.

– Kanskje må me til dømes også bruke kjøpesenter og andre areaner som stemmelokale. Eg er open for gode forslag, seier ho.

Ordføraren synest likevel at dei som jobbar med val på kommunehuset har gjort ein veldig god jobb med å legge til rette for utstrekt stemmegjeving i kommunen. 

– Unge er engasjerte

Hagen synest skulane har blitt veldig flinke til å ha politikk på agendaen dei seinare åra. Ho. håper det er med på å skape meir engasjement.

– Eg skulle likevel ønskje at me som driv med politikk oftare fekk innpass og kunne vere synlege og tilgjengelege for spørsmål og diskusjon der unge ferdast i kommunen, til dømes på skulane, seier ho.

Arbeiderparti-politikaren har lagt merke til at mange unge nemner dårleg kommuneøkonomi som noko ein ikkje likar, blant anna når dei blir spurt om dette i den faste ung-spalta i lokalavisa.

– Det viser at dei unge er opptatt av det som skjer rundt dei, sjølv om me kanskje opplever at det ikkje er så lett å engasjere dei. Det er jo heller ikkje så lett å lokke dei inn i politikken når me sjølv synest det er litt trått å drive politisk arbeid i Midt-Telemark grunna krevjande økonomi, seier Hagen.