Tankar i desse koronatider

Ein kveld eg sat ute på terrassen og gleda meg over kor fint det var fekk eg lyst til å dele nokre tankar. Det var litt ekstra vårstemning avdi eg så ei svale! Og det gamle ordtaket «Ei svale gjer ingen sommar» dukka opp på «hard-disken». Vi som er «online» heile tida brukar gjerne slike dataord. Men så kom det ei svale til og då måtte det vera sommaren som varsla om si koma likevel. Eg sat ute på terrassen avdi eg hadde klypt det eg kallar plen, sjølv om det no berre er ein grasbakke med mykje mose. Det var fyrste gong i år. Eg såg at det «var såre vel» og la føtene høgt. Det var so grønt og vakkert, heggen blømde, frukttrea såg ut som dei hadde fått ekstra næring og venta på på straumen av bier og humler. Tenkte dei ikkje på at det høgst kan vera 10 gjester? Bier med munnbind og humler med handsprit?