– Kva skal me leve av om ti år?

Kva for næringar bør me satse på for å få fleire arbeidsplassar i Midt-Telemark?

Det er eit stort spørsmål, men me treng neppe å finne éi vinnarnæring som skal bere utviklinga åleine. Styrken vår ligg i breidda i næringslivet – og i kulturen for å få ting til.

Bø og Midt-Telemark har lenge hatt eit rykte for å heie på dei som vil satse. For å vere ein «ja-kommune», der gode initiativ blir møtte med interesse, nyfikne og vilje til å finne løysingar.

Den kulturen er verdifull.

Me har allereie mange bein å stå på: landbruk og lokalmat, reiseliv og opplevingar, handel og tenester, bygg og handverk, industri og nye gründerar.

I tillegg har me Universitetet i Søraust-Noreg, som gjev tilgang til kompetanse, studentar, forskingsmiljø og nye idear.

Nye moglegheiter oppstår ofte nettopp når slike miljø blir kopla saman. Reiseliv kan møte lokalmat og kultur, landbruk kan møte teknologi og energi, og verksemder kan samarbeide om oppdrag, sirkularitet og nye verdikjeder dei ikkje kunne ha utvikla åleine.

Klarer me samstundes å kople studentar og forskarar endå tettare på det lokale næringslivet, kan det bli eit viktig konkurransefortrinn for regionen.

Det skjer òg ei spennande utvikling rundt oss. Fensfeltet i Nome kan gje nye leverandørmoglegheiter, og både i vår eigen region og i Kongsberg ser me kor viktig det er at verksemder kjenner kompetansen til kvarandre, utfyller kvarandre og samarbeider om større og meir krevjande leveransar.

Når verksemder gjer kvarandre gode og nyttar styrken som finst i naboverksemda, blir ikkje berre den einskilde verksemda sterkare – heile regionen blir meir attraktiv.

Neste veke blir leverandørutvikling sett på dagsordenen både gjennom leverandørkonferansen på Kongsberg og vår eigen kveld om leverandørmoglegheiter knytte til Fensfeltet.

Framtidas næringsliv kjem ikkje av seg sjølv. Me må leggje til rette for dei som vil starte, investere og skape noko nytt. Me må samarbeide, gjere kvarandre gode og nytte kompetansen som finst rundt oss.

Ingen veit kva for verksemder som blir dei viktigaste i 2036. Men me kan påverke kor gode vilkår dei får for å vekse fram her. Det er kanskje den viktigaste næringsstrategien av alle.