Rekordmange ryper og skogsfugl blir tald

– Me set i gang eit internasjonalt anerkjent forskingsprosjekt saman med NINA, som krev ekstra kartlegging. Heldigvis har me positive frivillige landet rundt som bidreg med takseringa nå, seier fagsjef i Statskog, Jo Inge Breisjøberget.

I ei melding frå Statskog blir det opplyst at takseringa pågår i perioden 1.-20. august. 

I 2024 registrerte Statskog langs 4 000 kilometer i terrenget, ein distanse som tilsvarer Oslo - Roma tur retur. 

Årets taksering vil innebere ny rekord med god margin.

Takseringane er avgjerande for at Statskog skal kunne tilby jakt innanfor ramma av berekraftig forvaltning.

Internasjonalt utstillingsvindu

– Verdien av dataene me får er uvurderleg og eineståande i internasjonal samanheng. Noreg skil seg ut her og er i ferd med å bli eit utstillingsvindu. Tellingane inneber heller ikkje nokon målbar forstyrring av rype og skogsfugl, seier Breisjøberget.

Statskog opplyser at takseringar blir gjennomført i område frå Njardarheim i sør til Reisavann i nord. Mengda data og den vitskaplege metoden gjer at bestandsestimata blir svært pålitelege.

Kompetanse og metode

Takseringane blir utførte for Statskog av medlemmar i foreiningar i Norges Jeger- og Fiskerforbund (NJFF), samt enkelte fuglehundklubbar. 

Alle taksørar er kursa og nyttar erfarne fuglehundar. Metoden som blir nytta er såkalla distance sampling - ei linjetaksering der fugl blir registrert langs faste linjer i terrenget.

Alle ekvipasjar er utstyrt med markeringsdekken merka «TAKST», og takseringane dekkjer lirype, storfugl, orrfugl og enkelte linjer for fjellrype.

Frå felt til forvaltning

Takseringsresultata blir mata inn i Statskog sin forvaltningsmodell, som igjen gir svar på kor mange som kan sleppast til på jakt i desse områda i haust.

Ei lang rekke forhold påverkar dei årlege bestandsvariasjonane hos rype og skogsfugl. Aller viktigast er syklusane innan smågnagarbestand. Mykje mus og lemen er attraktivt for rovdyr og bidreg til å avgrense predasjon av rype og skogsfugl. 

Når det er krasj i smågnagarbestanden får ein ifølgje Statskog langt høgare rovdyrpress på rype og skogsfugl.

– Førebels ser me innslag av både svake og lovande tal, men det er altfor tidleg å konkludere med noko. Me vil kunngjere resultata rundt månadsskiftet august-september frå teljingar i haust, seier Breisjøberget.

Landsdekkande innsats

Takseringane pågår no i følgjande område:

Sør-Noreg: Njardarheim, Kongsvoll, Finnemarka, Sølvverket, Gjerstad, Regionfelt Austlandet, Evenstadlia, Rendalen, Varaldskogen, Løten, Meitsjøen, Gravberget, Fulufjellet, Ljørdalen og Drevfjellet

Midt-Noreg: Bangdalen, Røros, Midtre Gauldal, Bogn og Gilten, Stjørdal, Meråker, Malvik, Meråker, Orkland-Melhus-Skaun, Namsskogan, Steinfjellet, Oppdal

Nordland: Heile fylket

Troms: Heile fylket