Har flytta Barnas dag: – I helga blir det moro på torget

Det har vore travelt etter skulestart for elevane i 8. og 10 klasse ved Bø ungdomsskule som har faget Innsats for andre. 

Etter bare to veker på skulen inviterer dei nå store og små barn til ein dag full av morosame aktivitetar på Bø torg. 

Har bytta helg

– Det er det første arrangementet til elevane dette skuleåret, og i år kjem det litt raskare enn me er vant til, opplyser fagansvarleg Ann Cathrin Haugland Andersen.

Barnas dag i Bø sentrum har vore ein tradisjon i 20 år, og dei siste åra har elevane ved ungdomsskulen vore med som arrangørar. 

Før har alltid Barnas dag gått av stabelen den første helga i september, men fordi ein nå har flytta konfirmasjonen i kyrkja til hausten, har skulen sett seg nøydd til å flytte Barnas dag til ei anna helg.

– Me kunne ikkje ta det helga etter, for da er det Dyrsku'n, og da blei det helga før. Laurdag 30 august blei booka i sommarferien, og nå håper me at mange tar turen til torget, seier Haugland Andersen.

Fyller heile torget

Ungdomsskuleelevane skal fylle heile torget med aktivitetar som er gratis for ungane.

– Me arrangerer også det populære Tour de Torg, så det er fint å ta med sykkelen sin. Det blir også sett opp ein kafé der ein kan kjøpe kaffi, saft, vaflar og sveler. Alle inntektene går til eit veldedig føremål, fortel elevane i arrangørkomitéen. 

På torget blir det elles ulike aktivitetar som barna kan delta i, og i fontena er det fiskedam med flotte premiar. 

– Ansiktsmåling og svampekasting pleier å vere dei mest morosamaste aktivitetane, opplyser ungdomsskuleelevane.

Det er totalt 23 elevar på 8. trinn og 13 elevar på 10. trinn som deltar på dette. Dei stiller alle opp på dei ulike aktivitetane for å hjelpe barna i gang, ifølgje Haugland Andersen.