Ein må stelle fint med haugebonden
UNIVERSITETET I SØRAUST-NOREG er ein av dei faste organisasjonane i Bø og Sauherad som gjestar denne spalta på omgang. Dei andre er Bø sokn, Evju bygdetun, Bø Museum og Sauherad og Nes sokn.
Fjøsnissen, eller haugebonden som han blei kalla i Bø og i Telemark, var eit vette som heldt til i fjøs, stall og låve, og levde tett inn på menneskja og deira daglege arbeid. Olav Nordbø fortel at «han hadde ei raud pikkelue på hue og eit raudt belte kring livet og han hadde grå klæde. Tyet i klæda var endå so tunt vove, so maskune var store og grove. Han var raudbleik og slettes ikkje ljot, men han hadde so store og stygge tennar. – Han var heller litenvoren.»
