– Trugar folkestyret og norsk kontroll

Fornybardirektivet trugar folkestyret og norsk kontroll over naturressursane

Torsdag 13. juni vedtok Stortinget å innlemma EUs reviderte fornybardirektiv frå 2018 (RED II) i EØS-avtalen. Det blir presentert som eit viktig steg i det grøne skiftet. Men i røynda handlar det om noko heilt anna: Ei alvorleg innskrenking av norsk sjølvråderett og ein veg mot meir sentralstyring frå Brussel.

Fornybardirektivet pålegg Noreg å leggje til rette for meir produksjon og bruk av fornybar energi, og stiller krav om enklare og raskare konsesjonsprosessar for nye kraftprosjekt. Det høyrest kanskje ut som god klimapolitikk, men i praksis betyr det at lokal påverknad og folkeleg motstand skal vike for eit overnasjonalt energimarknad styrt av EU. Noreg har allereie ein nesten heilt fornybar kraftforsyning. Me treng ikkje meir vindkraft for å dekke eigne behov – tvert imot ser me at både naturen og lokalsamfunna får svi for ei kraftpolitikk som rettar seg inn mot eksport og profitt.

Med Fornybardirektivet RED II på plass, banar det veg for den neste revisjonen – RED III – som no er under arbeid i EU og som legg opp til endå meir marknadsstyring og sentralisering. EØS-avtalen gjer at Noreg er forplikta til å gjennomføre EU-regelverk som blir rekna som relevante. Når eit direktiv først er teke inn i avtalen, må det gjennomførast i norsk rett.

Det betyr i klartekst at norsk energipolitikk blir forma i Brussel, ikkje på Stortinget. Dette er ikkje berre eit spørsmål om energi – det er eit spørsmål om kven som skal styre i Noreg. Skal det vera folkevalde organ i Noreg og lokalbefolkninga som bestemmer over areal, natur og ressursbruk? Eller skal det vera EU-kommisjonen sine behov?

Nei til EU meiner at det grøne skiftet må byggje på folkestyre, fornuftige prioriteringar og respekt for naturen. Me kan ikkje lata EØS-avtalen halda fram med å undergrava norsk suverenitet, steg for steg. Vedtaket om Fornybardirektivet RED II viser at tida er inne for ei open og ærleg debatt om kva EØS-avtalen eigentleg kostar oss.