– Denne næringa har blitt sterkare, og me er stolte av den

I år blir det arrangert eplefest på Gvarv for 20. gong. Mykje har skjedd sidan oppstarten, og endringar har blitt gjort undervegs. 

I dag står Norsk Eplefest støtt som ein solid og mangfaldig organisasjon som både trekker folk, skaper samhald og identitet og set fokus på ei viktig næring i Midt-Telemark.

Ifølgje dei som var med på oppstarten av Norsk Eplefest var det ikkje så mykje optimisme å spore i fruktnæringa på starten av 2000-talet. 

Ønsket var å dreie denne retninga ved hjelp av ein festival som kunne synleggjere fruktproduksjonen og skape positiv energi og synergieffekt for denne næringsgreina i regionen.

Ideen var å skape opplevingar i ein festival der fruktnæringa var i tett samspel med kunst og kultur, og løfte festen opp på nasjonalt nivå slik at ein kunne vise fram Midt-Telemark som den store fruktprodusenten som området er. 

Gjennom 20 år har det skjedd ei formidabel utvikling, og ein kan trygt seie at arbeidet har gitt frukter.

Å jobbe med festivalen og alt rundt er fortsatt viktig. Eplefesten synleggjer fruktnæringa, og stadig fleire byrjar å forstå at me snakkar om eit av dei størst epleområda i landet. 

Sjølv om marknadsdagen er ein fest for alle slags folk er den også viktig for å løfte fram fruktprodusentane og utvikle næringa vidare.

Gjennom Norsk Eplefest har det blitt skapt viktige nettverk gjennom Fruktbygda, der dei som er i næringa kan drive produktutvikling, profesjonalisering og utvikle næringa gjennom fellesskap og samarbeid. 

Det igjen skaper samspel med andre attraksjonar i regionen. Og ved å spele på kvarandre blir ein enda sterkare både i forhold til produksjon og turisme.

Mange av fruktprodusentane har vore langt fram i skoa tidleg, og har utvikla førsteprodukt som eplemost på kartong og kjølelager som gjer at norske eple kan bli lagra lenger. 

Det har vore mykje nyplanting dei siste åra, og i dag er det er flust av kreative og hardtarbeidande fruktbønder som er med på å skape ein boost for næringa. Det blomstrar nå i fruktmiljøet i Telemark.

Utviklinga blant bønder og produsentar har også ført til større bevisstheit for dei som bur i Midt-Telemark.

Epleproduksjonen har vore der i alle år, men nå slår me alle oss på brystet og viser til Fruktbygda og alle dei gode opplevingane me finn der. Fruktbygda er noko me er stolte av!