– Leiarar må ta tak når arbeidet går feil veg, i dag er det ekstra krevjande

«Ingenting varer evig» er eit ordtak mange kjenner seg att i. I kvardagslivet merkar me raskt når ting ikkje duger lenger. Nokre gonger er det nok å fornye seg med utgangspunkt i det same. Det er lett. Vanskelegare er det når etablerte ordningar ikkje held mål lenger. Då må ein lære på nytt. Utforske nye praksisar. Teste ut nye framgangsmåtar. Leiing må gjerne til for å klare dette. På Institutt for økonomi og IT (IØI) her i Bø er me opptekne av korleis bedrifter kan leiast på framgangsrike måtar. IØI høyrer til Universitetet i Søraust-Noreg, Handelshøyskolen. Våre utdanningstilbod rettar merksemda mot kritiske arbeidsområde i produksjonslivet. Døme på dette er jus, personaladministrasjon, IKT, rekneskap og budsjett. På IØI utdannar me personar med kapasitet til å handtere viktige arbeidsfunksjonar i bedrifta på best mogleg vis. Leiarrolla er viktig for å oppnå dette.