Kvardagsnåde

Eg står ved tørkestativet. Den kvite t-skjorta har ikkje bare blitt grå, ho har òg blitt mindre. Mannen min såg meg til og med i augo førre veke då han kom heim med det nye plagget, ei t-skjorte med god kvalitet som det var lagt litt ekstra pengar i. «Hugs at denne må vaskast på 30 grader». Jada, det hugsar eg. Men det hugsa eg altså ikkje, med mitt distré hovud og trong til effektivitet og multitasking. Typisk meg! Ikkje bare blei eg lei meg. Eg blei lei av meg. For det er ikkje fyrste gong eg gjer slike ukloke ting i farta. Fleire favorittkaffekoppar har blitt knust, nokre bulkar har eg kome heim med på bilen. Og så vidare.