Byggmeisteren bak dette huset pregar framleis bygdene i Midt-Telemark

Eg døyper denne spalta Historiske bøheringar. Med det same støyter eg på følgjande problem: Det store utvalet bøheringar det er verdt å skrive om. Skulle eg nå byrja heilt frå starten av, følgje streng kronologi, ville denne stubben handla om Torgrim Hallson. Han drog fram kniven ein gong på 1200-talet og «tagga» namnet sitt på kyrkjeveggen i Bø gamle kyrkje. Runene hans fann ein att på 1960-talet. Slik blei han den fyrste namngitte bøheringen. Bortsett frå at Torgrim uvitande enda opp som bøhering nummer 1, at far hans heitte Hall eller Halle, og at han lika å vandalisere kyrkjeveggar, så veit me ingen ting om Torgrim Hallson. Me må difor finne ein bøhering som verkeleg har sett preg på bygda. Valet landar på byggmeister Ole Jensson Haugen (1872-1970).